Día Mundial do Teatro

A Federación Galega de Teatro Afeccionado da que somos socios fundadores, enviounos o seguinte comunicado:

Como sabedes, o 27 de marzo festexamos o día mundial do teatro. Pode que esta data non sexa de todo especial para nós, que temos o corazón debaixo dos focos nos restantes 364 días, pero non queremos deixar escapar a ocasión de felicitar o noso día e mandar unha grande aperta para todas as persoas que integramos a FEGATEA e o teatro amador galego. Nestes tempos difíciles, nunca está de máis lembrar que non loitamos sós, pois somos moitas as persoas que queremos un teatro libre e digno.

Queremos, por iso, facervos chegar as palabras de Dario Fo, encargado do manifesto deste ano (en tradución ao galego da Mostra Internacional de Teatro de Ribadavia: Que as retranqueiras advertencias do mestre Fo nos preveñan e nos manteñan atentos e despertos.



"Hai moito tempo, o poder tomou unha decisión intolerante contra os comediantes ao botalos fóra do país. Actualmente, os actores e as compañías teatrais teñen dificultades para encontraren escenarios públicos, teatros e espectadores, todo por mor da crise.

Os dirixentes, polo tanto, xa non están preocupados por controlaren a aqueles que os citan con ironía e sarcasmo, xa que non hai sitio para os actores, nin hai un público ao que se dirixir.

Pola contra, durante o Renacemento, en Italia, os que gobernaban, tiveron que facer un esforzo importante para manteren a raia aos Comediantes, pois reunían abondoso público.

Sábese que o grande éxodo de actores da Commedia dell'Arte tivo lugar no século da Contrarreforma, cando se decretou o desmantelamento de todos os espazos teatrais, especialmente en Roma, onde foron acusados de ofenderen á cidade santa. En 1697, o Papa Inocente XII, baixo a presión de insistentes requirimentos do sector máis conservador da burguesía e dos máximos expoñentes do clero, ordenou a eliminación do Teatro Tordinona que, segundo os moralistas, dera acubillo ao meirande número de representacións obscenas.

Na época da Contrarreforma, o cardenal Carlos Borromeo, que estivo activo no norte de Italia, consagrouse á redención dos 'nenos milaneses', establecendo unha nidia distinción entre a arte, como máxima expresión da educación espiritual, e o teatro, coma manifestación do profano e do vaidoso. Nunha carta dirixida aos seus colaboradores, que cito de memoria, exprésase máis ou menos así: "Os que estamos a prol da erradicación das malas herbas, fixemos o posible por queimar textos que conteñen discursos infames, para extirpalos da memoria dos homes, e ao mesmo tempo perseguir a todos aqueles que divulgan eses textos impresos. Evidentemente, porén, mentres durmiamos, o diaño maquinou con renovada astucia. Ata que punto é máis punzante na alma o que os ollos poden ver que o que poidan ler dos libros dese xénero! Ata que punto máis devastadora para as mentes dos adolescentes e dos nenos é a palabra falada e o xesto apropiado, que unha palabra morta impresa nun libro! Polo tanto é urxente sacarmos ás xentes do teatro e das nosas cidades, como o facemos coas almas indesexables."

Polo tanto, a única solución á crise baséase na esperanza de que se organice unha gran caza de bruxas contra todos nosoutros e especialmente contra a xente moza que desexa aprender a arte do teatro: unha nova diáspora de Comediantes que, dende tal imposición, sen lugar a dúbidas, provocará beneficios inimaxinables para o ben dunha nova representación.

Saúde e teatro.

6º Encontro Teatral S. Andrés de Comesaña

Outro ano mais, e xa é o sexto, O TRASNO organiza un novo encontro teatral, onde como xa é habitual misturamos obras cómicas con dramáticas, teatro familiar con montaxes para adultos.

Como imaxinades no momento actual, onde os recortes castigan mais se cabe o mundo da cultura, non foi doado montar este encontro 2012, pero a ilusión de todos os membros do grupo e a unión do teatro afeccionado galego na FEGATEA (federación galega de teatro afeccionado) conqueriron que este ano tamén teñamos teatro en Comesaña.

Vémonos no teatro!!!

PAZO DE MOS - STA. MARIÑA DE CABRAL

Estas dúas últimas actuacións tiveron un algo en común: ser a primeira vez que o faciamos nos respectivos espazos, ainda que a Sta. Mariña, quizais fósemos fai moitos anos. Tamén nas características do respectable, pois se no primeiro non hai demasiado hábito do teatro, si o hai no segundo e en ámbolos dous casos non só foi bastante elevado o número de asistentes, que con ser boa cousa non o é tanto como o "saber estar", que foi exquisito. Isto, desgraciadamente, non pasa moi a miúdo, e por último o ágape que ao remate nos ofreceron tamén nos dous casos ainda que, como é lóxico con distintas características, deixounos enormemente compracidos.

Subliñar a sí mesmo, as características do Pazo de Mos, sin ser un local diseñado para teatro foi un verdadeiro pracer -salvadas as escaleiras de acceso- actuar nun local tan fermoso.

Pola súa banda en Sta. Mariña ao estar preto das pasadas Letras galegas todo o local estaba fermosamente engalanado de branco e azul e o escenario todo él en caixa negra coma nos prometeran os organizadores.

VIMIANZO

La Voz de Galicia o domingo 22 de abril publicaba na páxina de Bergantiños "en este viaje al pasado, los integrantes de la compañía viguesa O Trasno se meterán esta tarde en la piel de los protagonistas de una serie de historias relacionadas con la recuperación de la memoria histórica. De nuevo, el mensaje abunda en la necesidad de aprender de los errores del pasado. Conversas na cuneta mentres a vida pasa alá fóra es el título de la obra que interpretarán a partir de las 20 horas en el Auditorio de Vimianzo".

E así foi, no magnífico Auditorio de Vimianzo voltamos, e van xa moitas, a representar a nosa obra, por certo máis representada da nosa longa xeira.

FEGATEA MÓVETE 2012. RIBADAVIA 10 de Marzo ás 20 horas

O Trasno Novo Teatro representará "Conversas na cuneta mentras a vida pasa alá fora" no Auditorio da Casa da Cultura de Ribadavia o vindeiro 10 de marzo ás 20 horas.

Esta actuación enmárcase no "Fegatea Móvete 2012" ciclo de teatro organizado pola federación galega de teatro afeccionado con catro sedes diferentes, unha en cada provincia galega, Culleredo, Lugo, Ribadavia e Vigo.

Vai ser a primeira actuación do Trasno en Ribadavia o cal fainos moita ilusión, despois de unha chea de anos peregrinando ata Ribadavia para disfrutar do mellor teatro na súa Mostra Internacional de Teatro agora tócanos a nos mostrar alí o noso traballo.

Desexamos que vos guste!!