O Trasno Novo Teatro

SÁBADO 26 ÁS 20H, O TRASNO EN ARTEIXO

2011-11-25T21:15:00.002+01:00

Este sábado 26 de novembro ás 20 horas actuamos con "Conversas na cuneta mentres a vida pasa alá fóra" no Auditorio Municipal de Arteixo.

Esta actuación enmárcase dentro do ciclo de teatro organizado pola Asociación Teatral Paso de Valverde.

saúdos

Conversas na cuneta... en San Vicente do Mar

2011-11-09T18:05:00.000+01:00

O vindeiro domingo 13 de novembro ás 19 horas, actuaremos en San Vicente do Mar dentro do ciclo de teatro "Domingos de Outono" organizado pola asociación Roza do Pedrol. Poremos en escena "Conversas na cuneta mentres a vida pasa alá fora" na Casa da cultura Ángel Vázquez Hereder.

Noticia na Voz de Galicia do 3/11/2011:

A asociación Roza do Pedrol, de San Vicente do Grove, volve apostar un ano máis por poñer ao alcance dos seus veciños o mellor teatro afeccionado que se fai en Galicia. A celebración deste ciclo é posible, segundo explica a entidade organizadora, grazas a unha subvención concedida por parte da Dirección xeral de promoción e difusión da cultura, e ao respaldo da Federación galega de teatro afeccionado (FEGATEA) e da concellería de Cultura do Grove.

Unha aperta e ata o domingo

O Trasno

O TRASNO ACTÚA NO CAFÉ "HIPÓLITO BAR"

2011-10-05T21:19:00.005+02:00

O noso grupo sempre busca a máxima interacción co público, en moitas das nosas obras participa e noutras somos nós os que invadimos o seu espazo de tranquilos espectadores. Por iso o café-teatro é para nós unha experiencia desexada, procurada e sempre gratificante, onde o contacto direito co público e a súa reacción, que entra inmediatamente polos poros da pel, ante os estímulos que lle propoñemos excita, si excita, a actrices e actores coma ningún outro tipo de representación.

O Trasno ten actuado en cafés tan emblemáticos en Vigo, aínda que lamentablemente desaparecidos, como o "Trincheira" ou o "Odeón", e noutros que por fortuna aínda loitan como o "De Catro a Catro" ou o "Uf", así coma fóra da nosa cidade, coma por exemplo no "Ollo Ledo Café" de Ourense.

Nesta ocasión adaptamos a nosa anterior obra "D2N2,3" para podela representar neste tipo de espazos escénicos e así non perder este vicio de explorar tódalas posibilidades ao noso alcance no maravilloso mundo do TEATRO.

Esta estrea producirase o sábado día 8 de outubro ás 22 horas no café "Hipólito Bar" de Vigo, alí vos esperamos.

¡COMEDIA! PARA A ÚLTIMA XORNADA DO 5º ENCONTRO TEATRAL DE COMESAÑA

2011-09-22T21:17:00.000+02:00

Chegamos o final, e que mellor que rematar entre gargalladas e bágoas de ledicia.

Por iso mesmo O Trasno vos ofrece a actuación do grupo do Barco de Valdeorras (Ourense) GARGALLADA TEATRO cá obra " A Abraiante Vida de Braian", versión libre e desternillante sobre a vida de Braian, paisano de Xesús de Nazaret, cegado polo amor de Judith entrará como militante na Fronte Popular Xudea e loitará, a súa maneira, para liberar o seu pobo da opresión romana.

Esperámosvos en Comesaña para botar unhas risas xuntos e pechar o 5º Encontro Teatral S. Andrés de Comesaña, organizado por O Trasno.

Saúdos, creatividade e diversión.

3ª Xornada do 5º Encontro Teatral en Comesaña

2011-09-16T19:56:00.000+02:00

Este sábado 17 ás 21h, ¡ Tócalle ó Teatro Clásico !

O grupo Achádego Teatro de Lugo representa "As Alegres Comadres" de William Shakespeare, unha das mais divertidas comedias de enredo do ilustre dramaturgo inglés.

Despois de chegar o ecuador do Encontro Teatral, Os Trasnos estamos moi satisfeitos da voa resposta do público e de conseguir que grupos de toda Galicia visiten Comesaña e nos deleiten cós seus espectáculos de diversos xéneros.

Gracias e ¡que continúe o espectáculo!

2ª Xornada de Teatro en Comesaña

2011-09-08T11:19:00.000+02:00

O pasado sábado inaugurou o noso Encontro teatral a compañía Trécola de Ourense. Agasallounos cun emotivo e coidado espectáculo que encandilou a pequenos e maiores: “A ESTRAÑA HISTORIA DOS LADRÓNS DO TEMPO E DA NENA QUE DEVOLVEU O TEMPO ÓS HOMES”. unha revisión de Momo de Michael Ende.

Pasado mañá, sábado 10, seguindo a idea de O Trasno de ofrecer o espectro mais amplo posible do mundo teatral ós espectadores que se acheguen a Comesaña, cambiamos de rexistro e vos propoñemos a obra "Drammatico" do Grupo de Coruña "Paso de Valverde", un grupo que coida especialmente a expresión corporal e a proxección da voz, onde o actor e a actriz son absolutos protagonistas.

"Drammatico" é un espectáculo cómico e tráxico. A familia dos cómicos italianos I Fratelli Fratellini chega ao noso país coa sua aposta máis arriscada: por vez primeira na história da compañia apresentarán un espectáculo dramático. Duas xeracións de artistas do mesmo sangue levarán aos palcos unha historia onde o amor morre cedo e a miséria vai cimentando os ocos das relacións familiares. Unha historia de fracasos e ódios non tan lonxanos como quereriamos pensar.

Desexamos que vos guste.

5º Encontro Teatral S. Andrés de Comesaña

2011-08-25T17:15:00.001+02:00

Xa temos preparada a programación deste ano.

Como nos Encontros Teatrais anteriores tratamos de achegar propostas representativas das diversas tendencias de toda a xeografía da actual escena teatral galega, de diferentes xéneros e temáticas.

O cartaz que vos propoñemos vai dende o teatro infantil ata o teatro clásico, dende a comedia ata o drama, con postas en escena tradicionais e tamén vangardistas ou alternativas.

Desexamos que sexa do voso agrado. Nos posteriores post informaremos das características de cada espectáculo, estes terán lugar ás 21 horas dos sábados de setembro na Sociedade Nautilius de S. Andrés de Comesaña en Vigo.

Data Grupo Obra

03/09 Trécola (Ouren) Estraña Historia dos Ladróns de Tempo

10/09 Paso de Valverde (Arteixo) Drammático

17/09 Achádego (Lugo) As Alegres Comadres

24/09 Gargallada (O Barco) A Abraiante Vida de Brian

Por outra banda O Trasno levamos un tempo a traballar nun novo espectáculo, pretendemos pechar unha triloxía que comezou con "Unha muller, unha historia" en 1998 e continuou con "Muller Que?" no 2004, sobre o tema do encontro da muller coa súa propia vida.

Os temas referidos á muller en xeral ocupounos diversos tempos teatrais e aínda o temos en cartel dende 2008 con "Conversas na cuneta ..."

Unha teatral aperta

VACACIÓNS ACTIVAS

2011-08-03T15:35:00.002+02:00

Para a vosa tranquilidade o curso de Comedia do Arte celebrouse despois de tanto aprazamento. Foi unha experiencia moi enriquecedora para todos/as os/as participantes. Avelino imprimiu un ritmo esixente e trepidante que fixo que ademais de ser moi didáctico, práctico e ameno, este curso provocara "agujetas" nos/nas alumnos/as. Recomendámosvos a Avelino como profesor, tanto polos seus coñecementos, como pola súa entrega e implicación persoal.

Vestiario na furgoneta. Todas as trabas son pequenas
cando a ilusión polo teatro é o único importante.

Por outra banda seguimos actuando polo mundo adiante. O pasado 24 de xullo tivemos o pracer de actuar en Fornelos da Ribeira, por primeira vez ao aire libre con "Conversas na cunetra mentres..." (con outras obras xa o fixéramos). Foi unha actuación especial, con todo o pobo na praza, 300 persoas de todas as idades compartindo unha noite teatral. É de agradecer o entusiasmo e entrega dos membros da asociación Solpor que ano a ano levan teatro ata Fornelos a pesar das dificultades e a escaseza de medios.

Nós sentímonos moi ben, tanto durante a actuación, como no ágape e tertulia posterior. Grazas

En próximas entradas presentarémosvos a programación do 5º Encontro teatral S. Andrés de Comesaña, que temos case pechada.

2011-06-27T12:33:00.001+02:00

Cambio datas curso "Commedia dell'Arte"

Unha vez máis, por novos problemas de axenda, vémonos na obriga de cambiar as datas, pero non para tan lonxe. Nesta ocasión quedan deste xeito:

Domingo, día 3 de xullo
Sábado, día 9 de xullo

Os horarios seguen igual.

Disculpade. Esperámosvos.

O Trasno Novo Teatro

Comedia del Arte. Novas datas

2011-06-05T13:45:00.006+02:00

Por motivos de axenda tivemos que cambiar as datas do curso que vai impartir Avelino González.

Impartirase os días 2 e 3 de xullo (sábado e domingo) en horario de 10h a 14h e 16h a 20h, en San Andrés de Comesaña (Vigo).

O prazo de inscripción remata o 28 de xuño, quedan algunhas prazas.

¡ Animádevos !

CURSO DE "COMEDIA DEL ARTE"

2011-05-11T23:36:00.002+02:00

Xa estamos de volta.

Despois dun comezo de ano cargado de obrigacións laborais e personais para a maioría dos membros do noso grupo, recuperamos, pouco a pouco, a actividade teatral de O Trasno.

Tivemos un par de actuacións nestes primeiros meses de 2011 (Valadares, Salceda de Caselas, Entroido en Comesaña...) e temos como obxectivo preparar un novo espectáculo no que xa estamos a traballar.

Mentres cociñamos novos proxectos non podemos esquecer a nosa necesaria formación teatral, por iso organizamos un curso teatral (dentro do programa formativo da FEGATEA) para avanzar como actrices e actores na procura de interpretacións de mellor calidade. Nesta ocasión decidímonos pola "Comedia del Arte" e como mestre "Avelino González", director e actor profesional, quen xa ten colaborado noutras ocasións con O Trasno.

O curso vaise facer os sábados 21 e 28 de maio (16 horas en total) e aínda temos prazas por se alguén está interesado en acudir ao mesmo para disfrutar e aprender con nós.

Para que vos acabedes de animar deixámosvos os enlaces ás web's de Avelino Gonzalez para que vexades a súa experiencia e lle poñades cara.

http://www.avelinogonzalez.com/

http://avelinogonzalez.wordpress.com/about/

Unha aperta e feliz ano novo.

Fin de Festa co X Aniversario da FEGATEA

2010-11-21T22:00:00.002+01:00

Rematamos este ano 2010, a falta de algunha actuación de última hora que sempre aparece, con máis de 15 representacións, a organización do IV Encontro Teatral S. Andrés de Comesaña e a celebración do noso 30 Aniversario.

O balance é moi bo para O Trasno e os seus membros, visitamos novos escenarios e vilas, colaboramos con algúns grupos por 1ª vez, repetimos con outros e aprendimos de todos.

O que queda de ano o imos a adicar a cociñar novos proxectos e tamén á celebración do X Aniversario da FEGATEA (Federación Galega de Teatro Afeccionado), a cal como grupo fundador sentimos un pouco nosa. Participaremos tanto nos actos programados en Palas de Rei o próximo fin de semán como na gala no Teatro Principal de Santiago o 12 de decembro.

Dende este espacio vos convidamos a todos e todas a que compartades con O Trasno e o resto de grupos federados este importante evento.

Teatro e Liberdade Creativa.

CELEBRACIÓN E FOTOS DE TRES DÉCADAS.

2010-10-26T00:05:00.007+02:00

Deixámosvos dous enlaces. Un que vos levará a un percorrido en fotos pola nosa historia e outro para que vos fagades unha idea do espectáculo da celebración dos nosos 30 anos.

1980-2010: A nosa historia en fotografías.

Tamén queremos agradecer unha vez máis a imprescindible e desinteresada participación da Sociedade Cultural Nautilius (Coral e Grupo de Gaitas), de Carlos Castro, Bea Riobó e Avelino González. As súas actuacións deron o toque de calidade a este acto tan entrañable para nós.

Celebración dos 30 anos de O TRASNO Novo Teatro.

Por último expresar o noso orgullo de pertencer a "O Trasno", este grupo que non é só noso senón tamén de cada un dos 61 compoñentes que pasaron polas súas filas nestas tres décadas. O mellor deste acto foi o momento en que todos os ex-Trasnos presentes no Auditorio subiron con nós ao escenario.

Grazas a todos e todas.

30 ANOS DE TEATRO: 1980 a 2010.

2010-10-12T23:11:00.013+02:00

30 anos de vida do Grupo de Teatro

“O Trasno Novo Teatro” de Vigo.

En outubro deste ano 2010 "O Trasno" cumprimos trinta anos de funcionamento ininterrompido; neste longo período pasaron máis de 60 actores e actrices polo grupo, sendo canteira para grupos profesionais da comarca, para as series televisivas, etc.

Para celebrar esta efeméride dende "O Trasno" vos propoñemos un “Espectáculo Multidisciplinar” que se vai celebrar o próximo sábado 16 de outubro ás 20 horas no remodelado Auditorio do Concello de Vigo. Esperamos a todos/as os/as que pasaron polo grupo nalgún momento, así como amigos/as, simpatizantes e toda persoa que queira pasar un rato entretido e agradable.

Neste “Espectáculo Multidisciplinar” participarán persoas e grupos, de diversos campos artísticos, que teñen colaborado con O Trasno, ou viceversa, ao longo destes 30 anos da nosa historia. Entre os xa confirmados estarán: A Coral e Grupo de Gaitas da Sociedade Nautilius, Carlos Castro Roig (Membro de Fía na Roca, profesor do Conservatorio Superior de Música de Vigo...), Avelino González (polifacético actor profesional, natural de Comesaña, que ademais do teatro toca outros campos como as series televisivas, o cine, os monólogos, as animacións culturais...), e outras sorpresas.

Paralelamente, no mesmo Auditorio farase unha “Exposición de Carteis Teatrais” coa colección do propio grupo na que se atopan carteis desde o ano 1970 ata hoxe, non só do propio grupo senón tamén da maioría de Compañías Profesionais e Afeccionadas de Galiza así como outras do resto do estado.

Fundado en outubro do ano 1980 baixo o nome de “Sociedad Teatral O Trasno” por un grupo de mozos e mozas da parroquia de Comesaña en Vigo.

Estivo funcionando dentro da súa escaseza de medios técnicos, económicos e formativos propios daquel momento, e aínda así chegou a actuar no emblemático Teatro García Barbón coa obra “O pauto de San Formoso do Monte”.

Logo dun tempo fíxose cargo do mesmo Xaime Costas, quen xunto con integrantes do teatro escolar que dirixía e algúns dos fundadores do grupo, inician unha nova etapa que en 1988 coincide co cambio da denominación do Grupo á actual: “O TRASNO Novo Teatro”.

Na súa nova andadura, "O TRASNO Novo Teatro", formou parte dos grupos fundadores da FEGATEA (Federación Galega de Teatro Afeccionado) constituída no ano 2000. Así mesmo nos anos 2007, 2008, 2009 e neste 2010 organizou, respectivamente, o "I, II, III e IV Encontro Teatral S. Andrés de Comesaña” cunha ampla acollida e a participación de grupos locais e do resto de Galiza.

4º Encontro Teatral en fotos.

2010-09-27T22:50:00.002+02:00

4º Encontro Teatral S. Andrés de Comesaña.

Xa botamos o peche á cuarta edición do Encontro Teatral San Andrés de Comesaña. Dende O Trasno queremos agadecer ás catro compañias participantes o bo traballo ofrecido nas táboas de Comesaña, á Sociedade Nautilius pola súa imprescindible colaboración e, por suposto, ao público que nos acompañou nestes catro sábados disfrutando, iso esperamos, da variedade de estilos teatrais deste 4º Encontro, que foi do espectáculo infantil pasando polo drama ata chegar á comedia.

Agora tócanos a nós coller o carromato e facer novos camiños.

A próxima fin de semana convidamos a todos/as os/as nosos/as amigos/as do norte de Galiza ás actuacións que faremos nos ciclos de Culleredo e Narón.

Teatrais saúdos.

Acto final !!

2010-09-23T00:50:00.001+02:00

Despois do éxito de Ditea o pasado sábado chegamos á clausura do 4º Encontro Teatral San Andrés de Comesaña.

Para baixar o pano nesta edición vos ofrecemos un espectáculo teatral de alta escola. Non é estraño que Carrachanacacha teña recibido diversos premios por esta obra, o seu ritmo trepidante, a mordaz e irónica crítica ós “valores” da nosa sociedade, o seu humor ácido que conecta ó instante có espectador e lle arrinca sorrisos cómplices con personaxes e situacións, a súa coidada interpretación non defraudará a ninguén.

En fin non a podedes perder.

“Comendo pimentos de Padrom com Tarantino"

é a história dumha criatura que quere ser cantante...

é a história da sua nai, farta de coidar porcos, e do seu pasado...

é a história dum pianista no horizonte...

escrita e dirixida por Leandro Lamas.

Teatro de Cámara Ditea: 50 anos de amor polo teatro

2010-09-15T23:00:00.003+02:00

Nesta 3ª xornada do noso Encontro Teatral temos o pracer de recibir os nosos amigos de Ditea (Santiago). Presentan unha entrañable e entretida comedia que eles definen así:

“A poucos días de calquera estrea en calquera teatro, reina o desorde: teares caídos, cables por todos lados, etc., etc. E é aquí onde dúas limpadoras irrompen no escenario; dúas mulleres que, inmersas no trasfego cotiá e alleas a todo este enredo faranduleiro van, inconscientemente, deixándose levar por unha sensación de liberación que lles produce o “espazo de ficción” e, pouco a pouco, amosan as súas paixóns afogadas, tecéndose así unha trama na que, a través das súas tráxicas vivenzas - producto do condenado destino- recoñecemos un mundo moi próximo e, paradoxalmente, cómico.

Dous seres traxicómicos que, por un casual, permítense o luxo de soñar un acto efémero e imprevisto.

“Acto imprevisto” é un espectáculo que reflicte a realidade cotiá, unha realidade latente en cada esquina, que a través do humor, intenta aproximarse ao público cun sabor agridoce.”

Vémonos ó sábado no teatro.

XA ESTAN EIQUÍ !!!!!

2010-09-03T11:35:00.003+02:00

Inda ben non remataron os foguetes que anuncian o comezo das festas de Comesaña (Vigo), e xusto ao remate das actuacións dos grupos de baile, a pouco máis de douscentos metros:

"MARAÑAO, ASOCIACIÓN DE TEATRO" de Ourense están listos para poñer enriba do escenario da S.C. Nautilius o espectáculo que inicia o 4º Encontro Teatral.

RECICLOWN

Mañá sábado 4 de setembro ás 21 horas.

É unha obra especialmente dirixida ao público infantil pero que divertirá a todos e todas, ben estean na festa ou veñan de lonxe, ou de aí ao lado ou de máis lonxe aínda, pero que veñan, iso é o que importa pois a festa do teatro comeza en Comesaña e continuará os sábados sucesivos durante todo o mes.

...... para a semana máis !!!

E XA SON CATRO !!!!

2010-08-26T20:00:00.005+02:00

O que comezou como un “experimento”, unha proba, a ilusión de que os pobos e barrios, e non só as grandes urbes, poden ter ao seu alcance espectáculos teatrais de diversos estilos e de calidade, semella que comeza a consolidarse.

O Trasno iniciou esta andaina como organizador con non poucos atrancos, dificultades, escaseza de medios e de apoios, pero grazas ao esforzo de todos/as os/as integrantes e o convencemento de que alguén ten que dar sempre un primeiro paso, o 1º Encontro Teatral saíu adiante en 2007.

Moitos foron os sorprendidos pola boa acollida e o éxito de público, a verdade é que nós tamén. Pero a verdadeira sorpresa ocorreu pasados uns meses, cando a xente de Comesaña, os compañeiros/as de traballo, as amizades, comezaron a facer preguntas insólitas: ¿Que grupos veñen este ano?, ¿Traedes algunha comedia?, ¿Tedes obra infantil?, ¿Vai ser tamén en setembro?... e resultou que esta vez as preguntas foron máis importantes que as respostas; é por iso que chegaron o 2º e 3º Encontros.

Pois ben, hoxe temos o inmenso pracer de presentarvos a programación do “4º Encontro Teatral S. Andrés de Comesaña”.

O noso propósito segue sendo o mesmo, achegar toda a diversidade teatral posible ao público de Comesaña, Vigo e resto do mundo. Ao mesmo tempo, tamén procuramos intercambiar experiencias, maneiras e conceptos cos heteroxéneos grupos que nos visitan, ofrecéndolles un trato persoal, tentando atender as súas necesidades e resolvendo con eles as dificultades que supón, nalgúns casos, adaptarse ao limitado espazo do salón de Comesaña.

Temos que agradecer un ano máis á Federación Galega de Teatro Afeccionado (FEGATEA) a súa imprescindible colaboración para conseguir a subvención económica para pagar aos grupos. Tamén á Sociedade Nautilius e a Elisa, a súa presidenta, que nos deu todas as facilidades para utilizar o Salón de Actos, ademais de encargarse dos agasallos aos grupos participantes, incluíndo os gastronómicos ao remate da función, tan apreciados por actores e actrices.

O día 4 de setembro levántase o pano cunha obra dirixida ao público infantil, seguirá un drama que nos dará unha visión retrospectiva da sociedade contemporánea local e remataremos con dúas hilarantes comedias, tan distintas entre si que semella imposible que pertenzan ao mesmo xénero. Tamén teremos unha exposición conmemorativa do X aniversario da FEGATEA.

Iremos informándovos.

Benvidos e benvidas ao Teatro

2010: despois de anos de esforzo semella que chega a colleita.

2010-06-04T00:20:00.005+02:00

Pois si, moitas das loitas mantidas dende sempre polos do “teatro afeccionado” parecen estar a dar, non sen tempo, resultados positivos:

Este ano celebramos o X aniversario da nosa federación, a FEGATEA, despois de varios intentos falidos para agrupar os grupos de teatro afeccionado de Galicia poucos confiaban no seu futuro. Nembargantes vai facer dez anos, aumentando mes a mes o número de asociados, cun Festival anual (O Agustín Magán) consolidado e que mostra os mellores espectáculos do ano e, o mais importante, cun acordo coa Xunta, dende hai catro anos, para a celebración de ciclos teatrais por toda a xeografía galega.

2010 tamén é testemuña da inclusión, por primeira vez, dos grupos de teatro afeccionado no “Vigo a Escena”, circuíto teatral do noso concello vedado ata o de agora para nós. O Trasno xunto con outros grupos de Vigo vemos así cumprida unha antiga e insistentemente demandada aspiración.

Por último e seguramente mais transcendente para os Trasnos, cumprimos 30 anos de teatro ininterrompido e xa estamos preparando un acto de celebración que, se todo vai ben, celebraremos en outubro, despois de organizar por 4º ano consecutivo o Encontro Teatral de Comesaña en setembro, con grupos de varios puntos de Galicia.

Ademais de todos estes acontecementos seguimos cás nosas actuacións, este sábado en Coruña, repetimos no XII Certamen de Teatro Escolar e Afeccionado (Colexio Calvo Sotelo) onde tan ben tratados fomos o ano pasado.

Un saúdo a todos e todas por estar aí, tentaremos mantervos informados/as das nosas trasnadas.

27 de marzo: Día Mundial do Teatro

2010-03-26T00:15:00.008+01:00

O ITI leva celebrando o Día Mundial do Teatro cada 27 de marzo dende 1961, e cada ano realiza un acto para conmemorar este día. A encargada de redactar a mensaxe no presente ano foi Judi Dench.

Mensaxe do Día Mundial do Teatro

–Judi Dench –

O Día Mundial do Teatro é unha oportunidade para celebrar o Teatro dunha miríade de formas. O Teatro é unha fonte de entretemento e inspiración, e ten a habilidade de unificar as diversas culturas e ás xentes de todo o mundo. Pero o teatro é moito máis ca eso e tamén brinda oportunidades para educar e informar.

O Teatro representase en todo o mundo e non sempre nos escenarios tradicionais. As representacións poden suceder nun pequeno pobo de África, nunha montaña en Armenia ou nunha pequena illa do Pacífico. Todo o que precisa é un lugar e un público. O Teatro ten a habilidade de facernos sorrir, de facernos chorar, pero tamén debería facernos pensar e reflexionar.

O Teatro xurde a partires do traballo en grupo. Os actores son as persoas que se ven, pero hai un gran número de persoas ás que non se ve. Son tan importantes coma os actores e as súas variadas e especializadas habilidades fan que unha producción sexa posible. Tamén deberían compartir os triunfos e os éxitos que podan ocorrer.

O 27 de marzo é oficialmente o Día Mundial do Teatro. Por moitos motivos todos os días deberían ser considerados días do teatro, porque temos a responsabilidade de continuar a tradición de entreter, de educar e de iluminar as nosas audiencias, sen as cales non existiriamos.

Judi Dench, unha das actrices mais respectadas e populares do Reino Unido, foi a elixida polo Instituto Internacional do Teatro para redactar a mensaxe do Día Mundial do Teatro neste 2010, a actriz conseguiu gañarse unha reputación como unha das mellores actrices do período da post-guerra, principalmente polo seu traballo en teatro, disciplina que foi o seu punto forte ao longo da súa carreira. Foi condecorada pola Orden do Imperio Británico en 1970 para posteriormente ser nomeada Dama. Dench foi coñecida sobre o escenario particularmente na Royal Shakespeare Company, onde representou os roles principais de personaxes clásicos, modernos e cómicos, ademais de contar cunha dilatada traxectoria en televisión e cine.

Os Trasnos en Santiago e Herrera (Sevilla).

2010-01-21T21:21:00.005+01:00

Pois xa iniciamos unha nova década, case nada!. Dende O Trasno vos enviamos unha grande aperta de benvida a este 2010, ano moi especial para nos, como iredes descubrindo se seguides o noso blog.

Pero hoxe toca pechar 2009.

O pano caeu despois dun desenlace brillante. Decembro de 2009 xa está na nosa historia: Volvemos ser seleccionados por 4ª vez para o Festival Agustín Magán (Santiago) e representamos "Conversas na cuneta mentres a vida pasa alá fóra" no XII Festival Martín Arjona (Herrera-Sevilla), por primeira vez fóra de Galicia e en español.

O do Agustín Magán nos enche de satisfacción, é inmensamente gratificante que os/as compañeiros/as da nosa Federación Galega de Teatro Afeccionado nos escollan para que mostremos o noso espectáculo no seu festival anual, e ademais no Teatro Principal de Santiago, cargado de historia e nomes do TEATRO en maiúsculas.

Ir a Herrera foi toda unha experiencia. Canto nos lembramos dos titiriteiros, de pobo en pobo de vila en vila. Que dura tiña que ser esa viaxe permanente na procura dos aplausos, do sustento, das loanzas, soñando co éxito, ca praza chea de merda de centos de cabalos que trouxeran os seus amos dende lonxe para ver o espectáculo.

Pois a verdade nos non somos tan sacrificados, despois das nove horas de furgoneta fixemos turismo en Sevilla, ou sexa volta o redor da Giralda e despois viños e cañas e comer e mais cañas e rir a gargalladas, iso si coma bos galegos levamos con nos a chuvia, vaia diluvio.

En Herrera facía moito frío e as rúas estaban valeiras, a pesar diso a xente acudiu a función, os nervios das actrices eran evidentes, temíamos a posible confusión entre español e galego, que ó estar pendentes do idioma a obra perdera forza e ritmo, que non se entendera a historia e a mensaxe que queremos transmitir, de todo.

O remate o público aplaudía posto en pé e todo mereceu a pena.

Festivales Agustín Magán (Santiago) y Martín Arjona (Herrera - Sevilla).

Unhas poucas fotos do noso paso polos Festivais.

Seleccionados para os Festivais Agustín Magán (Santiago) e Martín Arjona (Herrera-Sevilla).

2009-11-30T20:00:00.002+01:00

“Conversas na cuneta mentres a vida pasa alá fora” foi seleccionada para participar no VIII Festival de Teatro Agustín Magán, organizado pola “FEGATEA” (Federación de Teatro Afeccionado de Galicia). Este é o Festival mais importante de Galicia para grupos non profesionais, onde se pretende reunir e mostrar ó público os mellores montaxes de cada ano.

A representación terá lugar no Teatro Principal de Santiago, o día 6 de decembro ás 21 horas.

Esta mesma obra tamén resultou elixida para ser representada en Herrera (Sevilla) dentro do XII Festival de Teatro Martín Arjona, o día 19 de decembro ás 20 horas, na Casa da Cultura.

Estamos moi ilusionados, tanto polo orgullo de ser seleccionados pola nosa Federación como por poder mostrar o noso traballo en terras andaluzas, o que suporá a primeira representación de esta obra en español.

Xa vos contaremos como nos vai.

Fotografías do 3º Encontro Teatral San Andrés de Comesaña.

2009-11-01T23:10:00.007+01:00

3º Encontro Teatral S. Andrés de Comesaña.

Rematamos o mes de Outubro cunha actividade febril: pechamos o noso "Encontro Teatral" con grande éxito de público o que nos anima de cara a futuras edicións. Ademais actuamos con "D2N2,3" en Trasmañó (Redondela) e con "Conversas na cuneta..." en Navia (Vigo), Vedra e Caranza (Ferrol).

Como grupo de Teatro Afeccionado cada actuación supón un gran esforzo xa que non se trata só de actuar, tamén temos que cargar o material na furgoneta, montalo no lugar da representación, actuar, desmontar todo, metelo na furgoneta, chegar o noso local e gardalo todo, ou sexa todo o día en danza. De calquer xeito todo vale a pena cando sonan os vosos aplausos como recoñecemento o remate da función. ¿Loucura? Pois unha pouca si.

A NOSA HISTORIA

2009-10-25T23:00:00.002+01:00

Fundado en 1980 baixo o nome de “Sociedad Teatral O Trasno” por un grupo de mozos e mozas da parroquia de Comesaña en Vigo. Estivo funcionando dentro da súa escaseza de medios técnicos, económicos e formativos propios daquel momento, e aínda así chegou a actuar no emblemático teatro García Barbón coa obra “O pauto de San Formoso do Monte”.

Logo dun breve tempo inactivo fíxose cargo do mesmo Xaime Costas, quen xunto con integrantes do teatro escolar que dirixía e algúns dos fundadores do grupo, inician unha nova etapa que en 1988 coincide co cambio da denominación do Grupo á actual: “O TRASNO Novo Teatro”.

Na súa nova andadura, O TRASNO Novo Teatro, formou parte dos grupos fundadores da FEGATEA constituída no ano 2000. Así mesmo nos anos 2007, 2008 e 2009 organizou, respectivamente, o "I, II e III Encontro Teatral S. Andrés de Comesaña” cunha ampla acollida e a participación de grupos locais e do resto de Galicia.

O longo destes anos producíronse, entre outros, os seguintes espectáculos:

"D2N2,3" (De dous en dous, tres) (2006 - en cartel) Trátase dunha estraña mestura baseada en textos de varios autores: Kafka, M.Kundera, J.Carrigan, J.P.Sartre e outros, dando base a tres diálogos.

“De dous en dous, TRES” tanto que se vexan os devanditos diálogos por separado como no seu conxunto, as situacións presentadas que a primeira vista poderían parecer imaxinarias, quizais non o sexan tanto e será o público quen o teña que descubrir.

Foi seleccionada para participar no IV Festival Agustín Magán (Santiago de Compostela), IV Festival de Teatro Afeccionado Concello de Sada (onde acadou o premio a Mellor Actriz), etc.

Elenco: Ana, Lucía, Miguel, Sefi e Xaime
Luces e Son: Miguel
Maquillaxe: Mª Xosé e Miriam
Dirección: O TRASNO Novo Teatro

“Vixía” (2003-2006) Creación propia partindo de textos de diversos autores. A trama ten lugar nun extrano hospicio de anciáns onde unha peculiar personaxe (a Vixía) marca o ritmo das súas vidas. Esta obra participou, entre outros, no IV Encontro Estatal de Teatro Afeccionado (Narón-A Coruña), II Festival Agustín Magán (Compostela) e II Semán de Teatro Afeccionado de Vigo.

“...muller¿que?” (2004-2005) Neste caso enfrontámonos por primeira vez cun monólogo partindo dun fragmento da obra de Sergi Belbel “Morir”.

“Aldea Mangala” (2001) creación realizada para o Día das Letras Galegas e que se foi ampliando e variando o longo de varios anos.

“O incerto señor don Hamlet príncipe de Dinamarca” (2001) Adaptación dun fragmento da mencionada obra de Álvaro Cunqueiro.

“Foreber” (2000-2002) Partindo do texto de Raúl Dans, novamente creouse un espectáculo o noso estilo. Participou no III Festival Español de Teatro Amateur (Zamora) co texto en galego e n0 I Festival Agustín Magán (Santiago).

“Unha muller , unha historia” (1998-2000) Adaptación do monólogo de Gabriel García Marquez “Diatriba de amor contra un hombre sentado” o cal convertemos nun espectáculo onde se representa a historia que alí se narra.

“Maresol” (1998-1999) o primeiro espectáculo específico para representar na praia, de corte mitolóxico e alta expresividade corporal. Entre outros lugares representouse na illa de Arousa e Malpica de Bergantiños.

“Vacacións para sempre” (1996-2005) espectáculo infantil de sombras chinesas e actores en vivo que tivo unha longa vida.

“Grito de Esperança” (1995-1998) Obra en portugués partindo do texto de Daniel Filipe, complementado con textos de outros autores, representada nos mais singulares espazos escénicos: cárcere de Vigo, pubs, cafés-teatro e ...

“Vinganza ou Xustiza” (1993-1995) Adaptación por primeira vez en Galicia de “A Orestiada” de Esquilo, un traballo realizado polo propio Grupo, transformando as mais de seis horas da obra orixinal en dúas horas e media, sen que perdera a esencia do texto clásico.

“¿Home!” (1988-1992) A primeira obra creada por O TRASNO Novo Teatro que o longo de catro anos represéntase por toda Galicia. Participa na I Mostra de Teatro Galego-Portugués en A Coruña.

Isto non quita que paralelamente houbese outras actividades complementarias:

No ano 2000 co gallo da conmemoración dos 20 anos de teatro, O TRASNO Novo Teatro, levouse adiante unha selección de fragmentos das obras encabezada por un espectáculo de animación “Benvidos ó teatro”.O mesmo tempo a conmemoración do Día das Letras Galegas deu lugar a diversos espectáculos, subliñando “Figuras” (1997) espectáculo de animación para todo tipo de público, “A Estatua” (1999) espectáculo ecolóxico-pedagóxico de animación infantil, e no 2002 espectáculo conxunto con dous grupos de pandereteiras.

Tamén se tomou a iniciativa para a montaxe durante varios anos das Comparsas de Entroido da Sociedade Veciñal Cultural e Deportiva Nautilius, na cal o Grupo integrárase como primeira actividade cultural no ano 1986, acadándose un premio no ano 1999 co “Soldadiño de chumbo”.

Formación:

Os integrantes do Grupo, no seu constante afán de mellora, participan en accións formativas varias, destacando as seguintes:

- Xornadas de Teatro Afeccionado -Compostela
- Xornadas do Consello da Cultura Galega
- Curso de Técnica Vocal
- Mónica de Nut
- Creación da personaxe
- Técnicas de iluminación (Salvador del Río)
- Gabriel Molina (Cafiolos)
- Cursos Maquillaxe
- Spencer FX e Paspallás
- Curso Técnica de Teatro
- Eduardo Alonso
- Foniatría
- Pablo Rodríguez
- Universidade de Vigo
- Convivencia experimental
- Rena Mirewzka do “Grotowsti”
- Obradoiro de teatro
- Iroshi Arai
- Cuba

Como despedida: Dobre Sesión

2009-10-06T07:00:00.016+02:00

Se o espectáculo anterior era para adultos, o do sábado é absolutamente para Todos e Todas. A "Escola de Teatro Falcatrueiros" de Monterroso ofreceranos dúas obras, "A verdadeira historia da carrapuchiña vermella" e "O Retabriño", teatro en familia feito por rapazas e rapaces que fan desta arte o seu medio de expresión.

O domingo para pechar este "3º Encontro" teatral actuaremos nós, "O Trasno Novo Teatro", organizador do mesmo, teremos a satisfacción de ofrecer "Conversas na cuneta mentres a vida pasa alá fóra" para o noso público máis esixente e fiel.

Obra seleccionada para participar en diversos certames de teatro e gañadora do “XII Certamen de Teatro Don Bosco de Coruña”.

Acudide todas e todos a este fin de festa a compartir a ilusión polo TEATRO.

Ás 20:00 horas no Salón de Actos da SVCD Nautilius
Rúa Sanín Nº 54 S. Andrés de Comesaña – Vigo

3ª Xornada. Chega a Comedia

2009-09-28T22:30:00.003+02:00

Seguimos a ter unha boa acollida do público e un alto nivel nas obras representadas. Estamos no ecuador do "3º Encontro Teatral S. Andrés de Comesaña" e chegan as gargalladas da man do representante da provincia de Ourense.

"Tiruleque" de O Carballiño ofrécenos "Club PK2". Din no seu programa que se trata dunha comedia de crimes e sexo, non exenta de denuncia social, e indican así mesmo, que é un espectáculo para adultos ou menores acompañados.

Sábado 3 de Outubro ás 20:00 horas no Salón de Actos da SVCD Nautilius.

Rúa Sanín Nº 54 (S. Andrés de Comesaña – Vigo)

2ª Xornada.Teatro vangardista

2009-09-22T01:30:00.003+02:00

Xa estamos en marcha.

Despois de gozar co bo facer dos actores e actrices de Fontevella, e da satisfacción de ver a gran resposta do público, toca cambiar radicalmente de estilo. O próximo sábado imos ter con nós a “Carfax Teatro” de Culleredo coa obra “O cuarto do príncipe”, unha obra de teatro-danza, cunha posta en escena vangardista e transgresora que non deixará a ninguén indiferente.

Este grupo coruñés leva máis de catro anos representando este espectáculo por todos os pobos e festivais de Galicia, non perdades a oportunidade de velos no "3º Encontro Teatral" de Comesaña.

Sábado 26 de Setembro ás 20:00 horas na Sociedade Nautilius, rúa Sanín Nº 54 Comesaña-Vigo. Entrada Gratuíta.

Inauguración do 3º Encontro Teatral

2009-09-18T20:40:00.007+02:00

Inicia o Encontro de Comesaña o grupo "Teatro Fontevella", de O Porriño. Colectivo de persoas maiores, ¡algunhas moi maiores!, que dende hai anos veñen facendo do teatro o seu lecer con ilusión e entrega. Presentarán a obra "Pra que viría eu ao médico...! ...nin sempre é anécdota."

Sábado 19 de setembro ás 20 horas, entrada gratuita.

Nos locais da Sociedade Nautilius, rúa Sanín Nº 54 Comesaña-Vigo.

3º Encontro Teatral San Andrés de Comesaña

2009-09-07T10:15:00.006+02:00

Entre os meses de Setembro e Outubro organizamos, nos locais da SVCD Nautilius na rúa Sanín Nº 54 (S. Andrés de Comesaña-Vigo), o "3º Encontro Teatral S. Andrés de Comesaña ", sendo as representacións as 20 horas.

Día 19/09: Teatro Fontevella (O Porriño) "Pra que viría eu ao médico...! ...nin sempre é anécdota".

Día 26/09: Teatro de Cámara Ditea (Santiago) "Acto imprevisto".

Día 03/10: Tiruleque (O Carballiño) "Club PK2".

Día 10/10: Escola de Teatro Falcatrueiros (Monterroso) "A verdadeira historia da carrapuchiña vermella" e “O Retrabriño”.

Día 11/10: O Trasno Novo Teatro (Vigo) "Conversas na cuneta mentres a vida pasa alá fóra".

Neste 3º Encontro optamos por traer un grupo de cada provincia galega, con propostas variadas que van dende a comedia, o teatro infantil, o drama.... Desexamos que teña tan boa acollida como os dous anos anteriores e disfrutemos todos e todas co TEATRO.

Preparando o 3º Encontro de Teatro de S. Andrés de Comesaña

2009-07-28T00:13:00.006+02:00

Nestas datas estivais en que temos menos actuacións, e nas que os membros do grupo aproveitamos para gozar dunhas cortas e merecidas vacacións, O Trasno segue a facer teatro.

Estamos a preparar o "3º Encontro de Teatro de S. Andrés de Comesaña", que celebraremos en setembro e outubro, onde imos contar coa participación dun grupo de cada provincia galega, ademais da estrea da nosa obra "Conversas na cuneta ..." diante do noso público, despois da boa acollida que tivo en Coruña, Lugo, Priegue, Freixo, etc...

A finais de agosto publicaremos o programa completo.

Bo verán a todos e todas.

Teatrais saúdos,

Catro premios para “Conversas na cuneta mentres a vida pasa alá fóra”

2009-06-22T01:08:00.031+02:00

"O Trasno Novo Teatro" obtivo 4 premios no XII Certamen de Teatro Don Bosco da Coruña na categoría de Teatro Afeccionado, polo espectáculo “Conversas na cuneta mentres a vida pasa alá fóra”

O sábado 20 de xuño na clausura do Certamen recibimos os premios:

Primeiro Premio na categoría de Teatro Afeccionado.

Premio á Mellor actriz: Sefi Romero.

Premios ás actrices máis destacadas na súa categoría: Mª Xosé González y Lucía G. Carballás.

Gracias a todas as persoas do certame polo exquisito trato recibido, en especial aos membros do xurado que valoraron positivamente o noso traballo e principalmente a Francisco Cousido pola súa dedicación a potenciar o mundo do Teatro Escolar e Afeccionado.

Adicamos estes premios a todas as mulleres que, como as nosas protagonistas, loitan por saír adiante na adversidade.

E agora A Coruña

2009-06-01T23:05:00.045+02:00

O vindeiro sábado 6 de xuño ás 18:00 horas, representamos "Conversas na cuneta mentres a vida pasa alá fóra" na Coruña, dentro do XII Certamen de Teatro Escolar e Afeccionado que organiza o grupo "Candilejas Don Bosco", no salón de actos do Centro Calvo Sotelo (Rúa Archer Milton Huntington nº 24).

Facía varios anos que O Trasno non actuaba na Coruña e temos moita ilusión e moitas ganas de presentar o noso último traballo, que esperamos teña unha boa acollida en liña coas últimas representacións na nosa provincia.

Invitámosvos a todos e todas a que se podedes, veñades disfrutar con nós da nosa obra e prometemos que non vos vai deixar indiferentes.

Contamos con vós.

Despedimos Abril

2009-05-02T13:54:00.006+02:00

O mes de Abril deixounos dous momentos para a memoria dos Trasnos:

O Festival do Minho en A Guarda, onde quedamos encantados coa cálida acollida do público á nosa obra. Queremos agradecer especialmente a Marisa e a Pilar a súa cercanía e disposición que fixeron moi fácil o noso traballo. Xa estamos desexando volver.

A actuación no multiusos de Redondela, espazo escénico que tiñamos pisado dúcias de veces como espectadores e no que, grazas a aposta pola nosa obra da Concellalía de Igualdade, puidemos mostrar o noso espéctaculo. Tamén mandamos un saúdo especial ao Colectivo Republicano de Redondela e ao seu presidente que con emoción nos felicitou ao remate da función.

Neste mes de maio volveremos representar "D2N2 3" e comenzamos preparar o "3º Ciclo de Teatro Afeccionado de S. Andrés de Comesaña" que se vai celebrar en setembro-outubro, e que esperamos teña a mesma gran acollida que nas dúas edicións anteriores.

27 de Marzo “Día Mundial do Teatro”

2009-03-25T22:54:00.005+01:00

O Día Mundial do Teatro celébrase o 27 de Marzo dende 1961, unha iniciativa do Instituto Internacional do Teatro , organismo dependente da UNESCO.
Con este motivo organízanse numerosas manifestacións teatrais en todo o mundo que intentan proporcionar algo máis de vitalidade a este xénero esquecido por moitos.
Dende O Trasno Novo Teatro vos animamos a celebrar esta data. Acudide ao teatro, ao café, ás rúas, alí onde actrices e actores vos fagan SENTIR a maxia da nosa arte, esa transmisión de sentimentos entre o real e o ficticio, entre personaxes e público.
Unha das actividades máis emblemáticas nesta data é a difusión da mensaxe redactada por unha personalidade de dimensión mundial, invitada polo Instituto Internacional do Teatro, para compartir as súas reflexións sobre os temas do teatro e a paz entre os pobos. Esta mensaxe lese, este día, na maioría dos teatros de todo o mundo.
Como cada ano, a estatua dedicada a Don Ramón María del Valle-Inclán, situada no Paseo de Recoletos de Madrid, lucirá a súa clásica bufanda branca e, pola noite faise o recorrido polos lugares que visito Max Estrella, protagonista de Luces de Bohemia, obra cá que don Ramón inaugurou o xénero do esperpento, mestura de traxedia, sátira e humor.
Este ano 2009, a tradicional mensaxe foi encargada ao dramaturgo, escritor e director de teatro brasileiro Augusto Boal.
Augusto Boal, foi quen desenvolveu o “Teatro do Oprimido”, método e formulación teórica dun teatro democrático, do pobo.
O pasado 2008, Augusto Boal, foi Candidato ao Premio Nobel da Paz. Exiliado en Estados Unidos en 1953, para volver a Brasil dous anos despois onde asume a dirección artística do Teatro de Area de Sãou Paulo.

Esta é a súa mensaxe:

Mensaxe do Día Mundial do Teatro 2009

Todas as sociedades humanas son espectaculares na súa vida cotiá e producen espectáculos en momentos especiais. Son espectaculares como forma de organización social e producen espectáculos como este que vostedes viñeron a ver.
Aínda que inconscientemente, as relacións humanas estructúranse de forma teatral: o uso do espacio, a linguaxe do corpo, a elección das palabras e a modulación das voces, a confrontación de ideas e paixóns, todo o que facemos no escenario facémolo sempre nas nosas vidas: ¡nós somos teatro!.
Non só as vodas e os funerais son espectáculos, tamén os rituais cotiáns que, pola súa familiaridade, non nos chegan á consciencia. Non só pompas, senón tamén o café da mañá e os bos días, os tímidos namoramentos, os grandes conflictos pasionais, unha sesión do Senado ou unha reunión diplomática; todo é teatro.Unha das principais funcións da nosa arte é facer conscientes eses espectáculos da vida diaria onde os actores son os propios espectadores e o escenario é a platea e a platea, escenario. Somos todos artistas: facendo teatro, aprendemos a ver aquilo que resalta aos ollos, pero que somos incapaces de ver ao estar tan habituados a miralo. O que nos é familiar convértese en invisible: facer teatro, ao contrario, ilumina o escenario da nosa vida cotiá.
En setembro do ano pasado fomos sorprendidos por unha revelación teatral: nós pensabamos que viviamos nun mundo seguro, a pesar das guerras, xenocidios, hecatombes e torturas que estaban acaecendo, si, pero lonxe de nós, en países distantes e salvaxes. Nós que viviamos seguros co noso diñeiro gardado nun banco respectable ou nas mans dun honesto corredor de Bolsa, fomos informados de que ese diñeiro non existía, era virtual, fea ficción dalgúns economistas que non eran ficción, nin eran seguros, nin respectables. Non pasaba de ser mal teatro con triste enredo, onde poucos gañaban moito e moitos perdían todo. Políticos dos países ricos encerrábanse en reunións secretas e de aí saían con solucións máxicas. Nós, as víctimas das súas decisións, continuabamos de espectadores sentados na última fila das bancadas.
Vinte anos atrás, eu dirixín “Fedra” de Racine, en Río de Xaneiro. O escenario era pobre: no chan, peles de vaca, ao redor, bambús. Antes de comezar o espectáculo, dicíalles aos meus actores: “Agora acaba a ficción que facemos no día a día. Cando crucemos eses bambús, alá no escenario, ningún de vós ten o dereito de mentir. O Teatro é a Verdade Escondida.” Vendo o mundo, ademais das aparencias, vemos a opresores e oprimidos en todas as sociedades, etnias, xéneros, clases e castes, vemos o mundo inxusto e cruel.
Temos a obrigación de inventar outro mundo porque sabemos que outro mundo é posible. Pero nos incumbe a nós o construílo coas nosas mans entrando en escena, no escenario e na vida.
Asistan ao espectáculo que vai comezar; despois, nas súas casas cos seus amigos, fagan as súas obras vostedes mesmos e vexan o que xamais puideron ver: aquilo que salta aos nosos ollos. O teatro non pode ser soamente un evento, ¡é forma de vida!
Actores somos todos nós, o cidadán non é aquel que vive en sociedade: ¡é aquel que a transforma!.

Augusto Boal

Novas Trasnadas no 2009

2009-02-21T01:23:00.039+01:00

A nosa intención durante este ano 2009 é promocionar a nosa nova obra "Conversas na cuneta mentres a vida pasa alá fóra" sen deixar de representar "D2N2, 3" sempre que teñamos ocasión.

O pasado día 13 tivemos o pracer de representar "Conversas na cuneta..." como clausura dun acto dedicado a mulleres no Museo Verbum de Vigo. A inmellorable acollida que este público, maioritariamente feminino, deu á nosa obra, que trata precisamente da situación das mulleres na posguerra, nos enche de satisfacción e ánimos para seguir adiante e buscar novas actuacións.

O próximo 7 de marzo volveremos representala, esta vez no Centro Cultural de Freixo en Vigo.

No Trasno tamén dedicamos parte do noso tempo aos máis cativos, por iso estivemos preparando un espectáculo para o público familiar titulado "O caso do canciño desaparecido", que puxemos en escena o martes de Entroido 24 de febreiro ás 17 horas na Sociedade Cultural Nautilius de San Andrés de Comesaña en Vigo. Trátase dun espectáculo interactivo no que os rapaces e rapazas pasarán de ser espectadores, a ser parte da propia representación integrándose no desenvolvemento da mesma.

Tamén queremos agradecer a todas as persoas que deixades comentarios e seguides o noso blog as vosas opinións, ánimos e parabéns que nos dedicades. Para nós é moi alentador saber que alguén valora o noso esforzo por levar o TEATRO alí onde non van nin irán as grandes compañías.

Por último pedirvos que, se sabedes de algún Concello que vai organizar Mostras ou Festivais de teatro afeccionado, nolo digades para poder participar. O que máis nos "pon" aos grupos de teatro afeccionado é actuar, poder mostrar o noso traballo a quen sexa e onde sexa.

Bicos e Apertas do Trasno Novo Teatro.

2ª Mostra de Teatro Afeccionado S. Andrés de Comesaña (2008)

2008-11-17T12:51:00.003+01:00

De 2ª Mostra de Teatro S. Andrés (2008)

Este ano 2008, e de novo no mes de Setembro, organizamos nos locais da SVCD Nautilius a " 2ª Mostra de Teatro Afeccionado de San Andrés de Comesaña ", sendo as representacións as 21.00 horas .

Día 6: Nova Escena Teatro "Cinco mulleres co mesmo vestido".

Día 13: Atrezo Teatro "Bagoas de Noitebra".

Día 20: Grupo Navia Teatro-Escola "O zapateiro e os sabios".

Día 27: Vichelocrego Teatro "SPOT".

Día 28: Grupo de Teatro Rueiro "A viúva de Dúpont"".

FOTOGRAFIAS D2N2 3 (2006-2008)

2008-11-12T00:31:00.000+01:00

D2N2 3

1ª Mostra de Teatro Afeccionado S. Andrés de Comesaña (2007)

2008-11-05T08:43:00.021+01:00

De 1ª Mostra de Teatro S. Andres (2007)

Durante o mes de Setembro do ano 2007 organizamos a " 1ª Mostra de Teatro Afeccionado de San Andrés de Comesaña" , integrada no Circuíto Teatral de Galicia.

Día 8: Apertura da Mostra a cargo do actor FRAN NUÑEZ.

Lohegrín Teatro presenta "Cadaleitos".

Día 15: O Trasno Novo Teatro presenta "D2N2,3".

Día 22: Grupo de Teatro Rueiro presenta "A viúva de Dupónt".

Día 29: Tarantela presenta "Vostede ten ollos de muller fatal".

Clausura da Mostra a cargo do actor AVELINO GONZÁLEZ.

As representacións tiveron lugar as 21.00 horas nos locais da SVCD Nautilius.

FOTOGRAFIAS VIXIA (2003-2006)

2008-10-11T00:28:00.002+02:00

De Vixia